служба святым первоверховным апостолам петру и павлу
Служба святым первоверховным апостолам петру и павлу
МИНІА, МѢСЯЦЪ ІУНІЙ.
(Кíевъ: Тѵпогра́фія Кíево-Пече́рской Ла́вры, 1893).
Въ 29-й де́нь.
Святы́хъ сла́вныхъ и всехва́льныхъ первоверхо́вныхъ апо́столъ Петра́ и Па́вла.
НА МАЛѢЙ ВЕЧЕРНИ,
На Г о́споди воззва́хъ: стихи́ры на 4, гла́съ 4. Подо́бенъ: Д а́лъ еси́ зна́меніе.
Д а́лъ еси́ хвале́ніе * Це́ркви Твое́й, Го́споди, * честны́я апо́столы Твоя́, * въ не́йже просіява́ютъ мы́сленніи свѣти́льницы, * Пе́тръ же и Па́велъ, * я́коже звѣ́зды слове́сныя, * вселе́нную озаря́юще, * и́миже просвѣти́лъ еси́ за́падный мра́къ, * Іису́се Всеси́льне, * Спа́се ду́шъ на́шихъ. [Два́жды.]
Д а́лъ еси́ утвержде́ніе * Це́ркви Твое́й, Го́споди, * Петро́ву тве́рдость, * и Па́вловъ ра́зумъ, * и свѣ́тлую му́дрость, * и обои́хъ богогла́сіе и́стинное, * е́ллинскую пре́лесть отгоня́щее, * тѣ́мже, тайноводи́ми отъ обои́хъ, * пое́мъ Тя́, * Іису́се Всеси́льне, * Спа́се ду́шъ на́шихъ.
Д а́лъ еси́ о́бразъ * обраще́нія согрѣша́ющимъ, * о́ба апо́столы Твоя́, * о́ваго у́бо отве́ргшагося Тебе́ во вре́мя стра́сти * и пока́явшася, * о́ваго же про́повѣди Твое́й сопротивля́ющася * и вѣ́ровавша, * и обою́ собо́ру первостоя́тельствующихъ друго́въ Твои́хъ, * Іису́се Всеси́льне, * Спа́се ду́шъ на́шихъ.
Сла́ва, гла́съ 8. Іоа́нна мона́ха:
Д осади́тель и гони́тель Це́ркве бы́лъ еси́, Па́вле всеблаже́нне, съ небесе́ же зва́нъ бы́въ, защити́лъ еси́ сію́ пресла́вно, е́йже ны́нѣ моли́ изба́витися отъ бѣ́дъ и спасти́ся душа́мъ на́шимъ.
И ны́нѣ, богоро́диченъ:
К ро́въ Тво́й, Богоро́дице Дѣ́во, врачевство́ е́сть духо́вное: въ о́нь бо прибѣга́юще, отъ душе́вныхъ неду́гъ избавля́емся.
На стихо́внѣ стихи́ры, гла́съ 2. Подо́бенъ: Е гда́ отъ дре́ва.
П е́тре, апо́столовъ основа́ніе, * ка́меню Христо́вы Це́ркве, * христіа́новъ нача́ло, * паси́ о́вцы твоего́ двора́ сла́вно: * а́гнцы твоя́ сохрани́ отъ волко́въ льсти́выхъ, * изба́ви ста́до твое́ отъ напа́стей лю́тыхъ, * тя́ бо моли́твенника къ Бо́гу неусы́пна стяжа́хомъ вои́стинну * и, о тебѣ́ хва́лящеся, спаса́емся вси́.
Сти́хъ: В о всю́ зе́млю изы́де вѣща́ніе и́хъ * и въ концы́ вселе́нныя глаго́лы и́хъ.
П а́вле, язы́ковъ ло́вче, * христіа́нъ предста́телю, * вселе́нныя свѣти́льниче, * уста́ немо́лчна Христа́, Жива́го Бо́га, * обтекíй, я́коже со́лнце, концы́ вся́ * проповѣ́даніемъ боже́ственныя вѣ́ры. * Разрѣши́ отъ у́зъ грѣхо́вныхъ вся́ восхваля́ющія тя́ * и крася́щіяся моли́твами твои́ми.
Сти́хъ: Н ебеса́ повѣ́даютъ сла́ву Бо́жію, * творе́ніе же руку́ Его́ возвѣща́етъ тве́рдь.
П е́тре, верхо́вный учениче́, Па́вле, апо́столовъ исполне́ніе, * пе́рвіи проповѣ́дницы, * ны́нѣ со дерзнове́ніемъ моли́теся къ Бо́гу приле́жно * и ско́рую по́мощь и разрѣше́ніе бѣ́дъ * вку́пѣ низпосли́те скорбя́щимъ на́мъ, * я́ко да похва́лимся вѣ́рою * и ны́нѣ въ сѣ́ни ва́шей * дѣ́лы проявля́юще покро́въ ва́шъ.
Сла́ва, гла́съ 4. Іоа́нна мона́ха:
Х ристо́съ, тя́ пе́рваго избра́въ, Пе́тре, основа́ніе вѣ́ры, вѣнча́ тя́, Иже всѣ́хъ Влады́ка тебе́ предрече́: блаже́нъ еси́, Си́моне ва́ръ Іо́на, я́ко пло́ть и кро́вь не яви́, священнопроповѣ́дника Моего́ сотвори́ тя́, но Оте́цъ Мо́й, Иже е́сть на небесѣ́хъ; Того́ моли́, богоблаже́нне апо́столе, дарова́ти на́мъ ве́лію ми́лость.
И ны́нѣ, богоро́диченъ:
И зба́ви на́съ отъ бѣ́дъ [на́шихъ, Ма́ти Христа́ Бо́га, Ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ].
А по́столовъ первопресто́льницы и вселе́нныя учи́теліе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.
Слава, и нынѣ, богородиченъ:
Е же отъ вѣ́ка утае́нное, [и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся: Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].
НА ВЕЛИЦѢЙ ВЕЧЕРНИ,
По обы́чномъ псалмѣ́ пое́мъ: Б лаже́нъ му́жъ. 1-й антифо́нъ. На Г о́споди воззва́хъ: стихи́ры на 8, гла́съ 2. Самоподо́бенъ. Андре́я Пи́рскаго:
К íими похва́льными вѣнцы́ * увязе́мъ Петра́ и Па́вла, * раздѣле́нныя тѣлесы́ * и совоку́пленныя ду́хомъ, * богопроповѣ́дниковъ первостоя́тели? * Оваго у́бо я́ко апо́столовъ преднача́льника, * о́ваго же я́ко па́че инѣ́хъ труди́вшася. * Си́хъ бо вои́стинну досто́йно безсме́ртныя сла́вы вѣнцы́ * вѣнча́етъ Христо́съ Бо́гъ на́шъ, * имѣ́яй ве́лію ми́лость. [Три́жды.]
К íими пѣ́сненными добро́тами * воспое́мъ Петра́ и Па́вла? * богоразу́мія крилѣ́, прелетѣ́вшія концы́ * и къ небеси́ возне́сшіяся, * ру́цѣ Ева́нгелія благода́ти, * но́зѣ и́стиннаго проповѣ́данія, * рѣ́ки прему́дрости, * кре́стныя ро́ги, * и́миже де́моновъ бро́вь Христо́съ низложи́, * имѣ́яй ве́лію ми́лость. [Три́жды.]
К íими духо́вными пѣ́сньми * похва́лимъ Петра́ и Па́вла? * Безбо́жія закла́вшія незатыка́емая уста́, * стра́шныя Ду́ха мечи́, * Ри́ма свѣ́тлая удобре́нія, * всея́ вселе́нныя пита́тели, * Но́ваго Завѣ́та богопи́санныя скрижа́ли мы́сленныя, * я́же въ Сіо́нѣ Христо́съ возгласи́, * имѣ́яй ве́лію ми́лость. [Два́жды.]
Сла́ва, гла́съ 4. Іоа́нна мона́ха:
Т рикра́тнымъ вопроше́ніемъ, е́же: Пе́тре, лю́биши ли Мя́? трикра́тное отверже́ніе Христо́съ испра́вилъ е́сть. Тѣ́мже и къ Тайновѣ́дцу Си́монъ: Го́споди, вся́ вѣ́си, вся́ зна́еши, Ты́ вѣ́си, я́ко люблю́ Тя. Тѣ́мже къ нему́ Спа́съ: паси́ о́вцы Моя́, паси́ избра́нныя Моя́, паси́ а́гнцы Моя́, я́же Мое́ю кро́вію снабдѣ́хъ во спасе́ніе. Того́ моли́, богоблаже́нне апо́столе, дарова́ти на́мъ ве́лію ми́лость.
И ны́нѣ, богоро́диченъ:
И же Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].
Вхо́дъ. Проки́менъ дне́. [ И чте́нія три́ ] :
Собо́рнаго посла́нія Петро́ва чте́ніе. [ Глава́ 1. ]
Б ра́тіе, благослове́нъ Бо́гъ и Оте́цъ Го́спода на́шего Іису́са Христа́, Иже по мно́зѣй Свое́й ми́лости порожде́й на́съ во упова́ніе жи́во воскресе́ніемъ Іису́съ Христо́вымъ отъ ме́ртвыхъ, въ наслѣ́діе нетлѣ́нно, и нескве́рно, и неувяда́емо, соблюде́но на небесѣ́хъ ва́съ ра́ди, и́же си́лою Бо́жіею соблюде́ни вѣ́рою во спасе́ніе, гото́вое яви́тися во вре́мя послѣ́днее. О не́мже ра́дуйтеся, ма́ло ны́нѣ, а́ще лѣ́по е́сть, приско́рбни бы́вше въ разли́чныхъ напа́стехъ, да искуше́ніе ва́шея вѣ́ры многочестнѣ́йше зла́та ги́бнуща, огне́мъ же искуше́на, обря́щется въ похвалу́ и че́сть и сла́ву, во открове́ніи Іису́съ Христо́вѣ, Его́же не ви́дѣвше, лю́бите, и на Него́же ны́нѣ не зря́ще, вѣ́рующе же, ра́дуетеся ра́достію неизглаго́ланною и просла́вленною, пріе́млюще кончи́ну вѣ́рѣ ва́шей, спасе́ніе душа́мъ.
Собо́рнаго посла́нія Петро́ва чте́ніе. [ Глава́ 1. ]
В озлю́бленніи, препоя́савше чре́сла помышле́нія ва́шего, трезвя́щеся соверше́ннѣ, упова́йте на приноси́мую ва́мъ благода́ть открове́ніемъ Іису́съ Христо́вымъ. Яко ча́да послуша́нія, не преобразу́ющеся пе́рвыми невѣ́дѣнія ва́шего похотѣ́ніи, но по зва́вшему вы́ Свято́му, и са́ми свя́ти во все́мъ житіи́ бу́дите. Зане́ пи́сано е́сть: свя́ти бу́дите, я́ко Азъ Свя́тъ е́смь. И а́ще Отца́ называ́ете, нелицемѣ́рно судя́ща кому́ждо по дѣ́лу, со стра́хомъ житія́ ва́шего вре́мя жи́тельствуйте, вѣ́дяще, я́ко не нетлѣ́ннымъ сребро́мъ или́ зла́томъ изба́вистеся отъ су́етнаго ва́шего житія́, отцы́ пре́даннаго, но честно́ю кро́вію, я́ко Агнца непоро́чна и пречи́ста, Христа́.
Собо́рнаго посла́нія Петро́ва чте́ніе. [ Глава́ 2. ]
В озлю́бленніи, молю́, я́ко прише́льцы и стра́нники, огреба́тися отъ плотски́хъ похоте́й, я́же вою́ютъ на ду́шу, житіе́ ва́ше иму́ще добро́ во язы́цѣхъ, да о не́мже клеве́щутъ ва́съ, а́ки злодѣ́евъ, отъ до́брыхъ дѣ́лъ ви́дѣвше, просла́вятъ Бо́га въ де́нь просвѣще́нія. Повини́теся у́бо вся́кому человѣ́чу созда́нію, Го́спода ра́ди: а́ще царю́, я́ко преоблада́ющую; а́ще ли же князе́мъ, я́ко отъ Него́ по́сланнымъ, во отмще́ніе у́бо злодѣ́емъ, въ похвалу́ же благотво́рцемъ. Яко та́ко е́сть во́ля Бо́жія, благотворя́щимъ обуздова́ти безу́мныхъ человѣ́къ невѣ́жество, я́ко свобо́дни, а не я́ко прикрове́ніе иму́ще зло́бы свобо́ду, но я́ко раби́ Бо́жіи. Всѣ́хъ почита́йте, бра́тство возлюби́те, Бо́га бо́йтеся, царя́ чти́те. Раби́, повину́йтеся во вся́комъ стра́сѣ влады́камъ, не то́кмо благи́мъ и кро́ткимъ, но и стропти́вымъ. Се́ бо е́сть уго́дно предъ Бо́гомъ, а́ще со́вѣсти ра́ди Бо́жія терпи́тъ кто́ ско́рби, стражда́ безъ пра́вды. Ка́я бо похвала́, а́ще согрѣша́юще, му́чими, терпите́? Но, а́ще добро́ творя́ще и стра́ждуще, терпите́, сіе́ уго́дно предъ Бо́гомъ. На сіе́ бо и зва́ни бы́сте, зане́ и Христо́съ пострада́ по на́съ, на́мъ оста́вль о́бразъ, да послѣ́дуемъ стопа́мъ Его́. Иже грѣха́ не сотвори́, ни обрѣ́теся ле́сть во устѣ́хъ Его́. Иже укоря́емь, проти́ву не укоря́ше, стражда́, не преща́ше, предая́ше же Судя́щему пра́ведно. Иже грѣхи́ на́ша Са́мъ вознесе́ на тѣ́лѣ Свое́мъ на дре́во, да, отъ грѣ́хъ избы́вше, пра́вдою поживе́мъ.
На литíи стихи́ры, гла́съ 2. Самогла́сны. Андре́я Іерусалими́ты:
Г ряди́те, собо́ри дне́сь вѣ́рныхъ, благохва́льное и кра́сное собра́ніе, благода́ти избра́нныя хитрецы́, Петра́ и Па́вла, подо́бными хвала́ми вѣнча́емъ, я́ко незави́стно всѣ́мъ сло́во всѣ́явше, съ си́ми и благода́ть Ду́ха обогати́ша, и, и́стиннаго виногра́да су́ще ло́зіе, гро́здъ зрѣ́лъ на́мъ воздѣ́лаша, веселя́щъ сердца́ на́ша. Къ ни́мже открове́ннымъ лице́мъ и чи́стою со́вѣстію возопіе́мъ, глаго́люще: ра́дуйтеся, разори́тели безслове́сныхъ и служи́теліе слове́сныхъ; ра́дуйтеся, всѣ́хъ Творца́ и Строи́теля избра́нія кра́сная; ра́дуйтеся, хода́таи благи́хъ и отгони́теліе ле́стныхъ, и́хже да умо́лимъ: моли́теся при́сно къ Зижди́телю и Учи́телю ми́ръ крѣпкостоя́теленъ мíру дарова́ти и душа́мъ на́шимъ ве́лію ми́лость.
У ченики́ Христо́вы и основа́нія Це́ркве, и́стинныя столпы́ и стѣ́ны и трубы́ боже́ственныя Христо́выхъ уче́ній и страда́ній, верхо́вныя Петра́ и Па́вла, я́ко всего́ мíра предста́тели, восхва́лимъ: сíи бо, обте́кше широту́ всея́ земли́, я́коже ра́ломъ, всѣ́яша вѣ́ру и всѣ́мъ богоразу́міе всади́ша, Тро́ическое явля́юще Сло́во. О, Пе́тре, ка́меню и основа́ніе, и Па́вле, сосу́де избра́нный! Иже и сопряже́нніи волы́ Христо́вы, вся́ привлеко́ша къ богоразу́мію язы́ки, гра́ды же и о́стровы, евре́и же па́ки ко Христу́ возведо́ша, и мо́лятъ спасти́ся душа́мъ на́шимъ.
П е́тре, верхо́вне сла́вныхъ апо́столъ, ка́меню вѣ́ры, и Па́вле чу́дне, святы́хъ Церкве́й витíя и свѣти́льниче, Боже́ственному престо́лу предстоя́ще, о на́съ Христу́ моли́теся.
П а́вле, уста́ Госпо́дня, основа́ніе уче́ній, иногда́ у́бо гони́тель Іису́са Спа́са, ны́нѣ же и первопресто́льникъ апо́столовъ бы́въ, блаже́нне. Тѣ́мже неизглаго́ланная ви́дѣлъ еси́, му́дре, да́же до тре́тіяго небесе́ возше́дъ, и взыва́лъ еси́: пріиди́те со мно́ю, и благи́хъ не лиши́мся.
Гла́съ 3. Іоа́нна мона́ха:
В ы́шняго Іерусали́ма гра́ждане, ка́мень вѣ́ры, витíя Це́ркве Христо́вы, Тро́ическая дво́ица, мíра ловцы́, оста́вльше дне́сь я́же на земли́, отыдо́ша страда́ніемъ къ Бо́гу и мо́лятся Ему́ со дерзнове́ніемъ спасти́ся душа́мъ на́шимъ.
Сла́ва, гла́съ 5. Византíево:
П рему́дрость Бо́жія, Соприсносу́щное Сло́во Отчее, я́коже въ Ева́нгеліяхъ предрече́, многопло́дныя ло́зы вы́ есте́, всехва́льніи апо́столи, и́же гро́здъ зрѣ́лъ и красе́нъ въ вѣ́твехъ ва́шихъ нося́щіи, его́же, вѣ́рніи, яду́ще, услажда́емъ вку́съ къ весе́лію. Пе́тре, ка́меню вѣ́ры, и Па́вле, похвало́ вселе́нныя, утверди́те ста́до, е́же стяжа́сте уче́ньми ва́шими.
И ны́нѣ, богоро́диченъ:
Б лажи́мъ Тя́ Богоро́дице [Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу, и прибѣ́жище ду́шъ на́шихъ].
На стихо́внѣ стихи́ры самогла́сны, гла́съ 1. Андре́я Кри́тского:
Я же по вся́ гра́ды у́зы и ско́рби твоя́, * кто́ ска́жетъ, сла́вне апо́столе Па́вле? * Труды́, болѣ́зни и бдѣ́нія, * я́же во а́лчбѣ и жа́ждѣ злостра́стія, * я́же въ зимѣ́ и наготѣ́, ко́шницу и жезлобіе́нія, * каменомета́нія и обхожде́нія, глубины́ истопле́нія, * позо́ръ бы́лъ еси́ а́нгеловъ и человѣ́ковъ. * Вся́ у́бо претерпѣ́лъ еси́ о укрѣпля́ющемъ тя́ Христѣ́, * да мíръ пріобря́щеши, о Христѣ́ Іису́сѣ, Го́сподѣ твое́мъ. * Тѣ́мже мо́лимъ тя́, творя́щіи па́мять твою́ вѣ́рно: * непреста́нно моли́ спасти́ся душа́мъ на́шимъ.
Сти́хъ: В о всю́ зе́млю изы́де веща́ніе и́хъ * и въ концы́ вселе́нныя глаго́лы и́хъ.
Я же по вся́ гра́ды вяза́нія и ско́рби твоя́ * кто́ исповѣ́сть, сла́вне апо́столе? * Или́ кто́ предста́витъ по́двиги и труды́ твоя́, * и́миже труди́лся еси́ во Ева́нгеліи Христо́вѣ, * да вся́ пріобря́щеши и Христу́ приведе́ши Це́рковь? * Но сію́ проси́ сохрани́ти до́брое твое́ исповѣ́даніе, * да́же до коне́чнаго издыха́нія, * Па́вле апо́столе и учи́телю Це́рквей.
Сти́хъ: Н ебеса́ повѣ́даютъ сла́ву Бо́жію, * творе́ніе же руку́ Его́ возвѣща́етъ тве́рдь.
С вѣти́льники вели́кія Це́ркве, * Петра́ и Па́вла восхва́лимъ: * па́че бо со́лнца возсія́ша на тве́рди вѣ́ры * и язы́ки заря́ми проповѣ́данія отъ невѣ́дѣнія возведо́ша. * Овъ у́бо на крестѣ́ пригво́ждься, * къ небеси́ ше́ствія творя́, * идѣ́же Ца́рствія ключи́ отъ Христа́ прія́тъ, * о́въ же мече́мъ усѣ́ченъ бы́въ, * ко Спа́су отше́дъ, * по достоя́нію ублажа́ются * и о́ба Изра́илю возвѣща́ютъ, * я́ко на Самаго́ Го́спода непра́ведно ру́цѣ просте́рша. * Тѣ́мже моли́твами и́хъ, Христе́ Бо́же на́шъ, * на ны́ шата́ющіяся низложи́ * и правосла́вныхъ вѣ́ру утверди́, * я́ко Человѣколю́бецъ.
Сла́ва, гла́съ 6. Ефре́ма Карíя:
П ра́здникъ ра́достенъ возсія́ конце́мъ дне́сь: всечестна́я па́мять прему́дрыхъ апо́столъ и верхо́вныхъ Петра́ и Па́вла, тѣ́мже и Ри́мъ сра́дуется, ликовству́я въ пѣ́снехъ и пѣ́ніихъ. Пра́зднуемъ и мы́, бра́тіе, всечестны́й сíй де́нь соверши́вше. Ра́дуйся, Пе́тре апо́столе, и́скренній дру́же твоего́ Учи́теля, Христа́, Бо́га на́шего; ра́дуйся, Па́вле вселюбе́знѣйшій, и проповѣ́дниче вѣ́ры, и учи́телю вселе́нныя; я́ко имѣ́я дерзнове́ніе, супру́же святоизбра́нный, Христа́, Бо́га на́шего моли́те спасти́ся душа́мъ на́шимъ.
И ны́нѣ, богоро́диченъ:
Т воре́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].
На благослове́ніи хлѣ́бовъ тропа́рь, гла́съ 4, два́жды [ пи́санъ на ма́лѣй вече́рни ] , и Б огоро́дице Дѣ́во. еди́ножды. И чте́ніе.
НА УТРЕНИ,
На Б о́гъ Госпо́дь: Тропа́рь апо́столовъ, два́жды. Сла́ва, и ны́нѣ, богоро́диченъ: Е же отъ вѣ́ка утае́ное.
По 1-й каѳи́смѣ сѣда́ленъ, гла́съ 8. Подо́бенъ: П рему́дрости.
Г лубину́ ловле́нія оста́вль, съ небесе́ пріе́мъ отъ Отца́ боже́ственное открове́ніе Сло́ва воплоще́нія, и со дерзнове́ніемъ вѣ́рно вопія́лъ еси́ Зижди́телю Твоему́: Бо́жія Тя́ вѣ́мъ Сы́на Единосу́щна. Тѣ́мже по достоя́нію вои́стинну показа́лся еси́ ка́мень вѣ́ры и ключа́рь благода́ти, Пе́тре апо́столе. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.
Сла́ва, гла́съ 1. Подо́бенъ: К а́мени запеча́тану.
Ц ерко́внаго ка́меня, всехва́льнаго Петра́, и побо́рника Па́вла, мірску́ю мре́жу, досто́йно восхва́лимъ, вѣ́рніи, я́ко иму́ща ключи́ небе́сныя: отъ ни́хъ бо просвѣти́ся вселе́нная вѣ́рою Тро́ическою. Сла́ва Просла́вльшему ва́съ, сла́ва Укрѣ́пльшему вы́, сла́ва Дарова́вшему ва́съ ра́ди жи́знь вѣ́чную.
И ны́нѣ, богоро́диченъ:
Р у́цѣ Твои́ боже́ственніи, и́миже Созда́теля понесла́ еси́, Дѣ́во Пресвята́я, вопло́щшагося благосты́нею, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ рождество́мъ Твои́мъ.
По 2-й каѳи́смѣ сѣда́ленъ, гла́съ 8. Подо́бенъ: П рему́дрости.
С ъ небесе́ зва́ніе отъ Христа́ пріи́мъ, яви́лся еси́ проповѣ́дникъ Свѣ́та, всѣ́хъ благода́ти озари́лъ еси́ уче́ньми: зако́на бо служе́ніе пи́смене изструга́въ, вѣ́рнымъ облиста́лъ еси́ ра́зумъ Ду́ха. Тѣ́мже и въ тре́тіе не́бо досто́йнѣ взя́тся превы́спренно, и въ ра́й дости́глъ еси́, Па́вле апо́столе. Моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́.
Сла́ва, гла́съ 4. Подо́бенъ: Я ви́лся еси́ дне́сь.
С вѣтолу́чными сія́ніи, я́коже звѣ́зды, земны́я концы́ просвѣща́ете уче́ніи святы́я про́повѣди, небе́сніи таи́нницы, Госпо́дни апо́столи.
И ны́нѣ, богоро́диченъ:
Т е́плое заступле́ніе су́щимъ въ бѣда́хъ, и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.
Велича́ніе: В елича́емъ ва́съ, апо́столи Христо́вы Пе́тре и Па́вле, ве́сь мíръ уче́ньми свои́ми просвѣти́вшія и вся́ концы́ ко Христу́ приве́дшія.
Псало́мъ избра́нный: Н ебеса́ повѣ́даютъ сла́ву Бо́жію. ]
По поліеле́и сѣда́ленъ, гла́съ 8. Подо́бенъ: П рему́дрости.
В ерхо́вныя я́вльшіяся отъ учени́къ, вели́кія свѣти́льники и свѣ́тлыя, Петра́ да восхва́лимъ и прему́драго Па́вла: огне́мъ бо Боже́ственнаго просія́вшія Ду́ха, мглу́ пре́лести попали́ша всю́, тѣ́мже и вы́шняго Ца́рствія ору́жницы досто́йнѣ показа́шася и благода́ти сопресто́льницы. Сего́ ра́ди вопіе́мъ: апо́столи Христа́ Бо́га, прегрѣше́ній оставле́ніе испроси́те пра́зднующимъ любо́вію святу́ю па́мять ва́шу. [Два́жды.]
Сла́ва, и ны́нѣ, богоро́диченъ:
Я ко Всенепоро́чная Невѣ́сто Творцу́, я́ко неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ще скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.
Степе́нна, 1-й антифо́нъ 4-го гла́са. Проки́менъ, гла́съ 4: В о всю́ зе́млю изы́де вѣща́ніе и́хъ, * и въ концы́ вселе́нныя глаго́лы и́хъ. Сти́хъ: Н ебеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. В ся́кое дыха́ніе. Сти́хъ: Х вали́те Бо́га во святы́хъ Его́. Ева́нгеліе Іоа́нна, зача́ло 67.
По 50-мъ псалмѣ́ стихи́ра, гла́съ 6. Самогла́сна:
Благоче́стія и́стинныя проповѣ́дники и Це́ркве пресвѣ́тлыя звѣ́зды пѣ́сньми похва́льными почти́мъ, Петра́, ка́меня вѣ́ры, и Па́вла, и́стиннаго учи́теля и таи́нника Христо́ва. Сíи бо и́стинное сло́во всѣ́явше въ сердца́ вѣ́рныхъ, всѣ́мъ плодоно́сіе да́рующа, и мо́лятъ Христа́ Бо́га спасти́ся душа́мъ на́шимъ.
Кано́на два́. Творе́ніе Іоа́нна Дамаски́на.
Пе́рвый свята́го апо́стола Петра́, гла́съ 4, со ирмосо́мъ на 8, ирмо́съ по два́жды, тропари́ на 6.
Пѣ́снь 1.
Ирмо́съ: Н ѣ́сть Тебѣ́ подо́бенъ, препросла́вленный Го́споди, руко́ю бо крѣ́пкою изба́вилъ еси́ лю́ди, я́же стяжа́лъ еси́, Человѣколю́бче.
В ерхо́внѣйшаго апо́столовъ дне́сь, я́ко первозва́ннаго Христо́ва, богодохнове́нными пѣ́сньми досто́йно воспои́мъ.
Т я́ предвѣ́чный проувѣ́дѣвъ, предуста́ви, всеблаже́нне Пе́тре, я́ко предста́теля Своея́ Це́ркве и первопресто́льника.
Н и пло́ть, ниже́ кро́вь тебѣ́, но Оте́цъ вдохну́ Христа́ богосло́вити, Сы́на и́стиннаго Бо́га Вы́шняго, апо́столе.
Богоро́диченъ: Г о́ру святу́ю, превы́шнее носи́ло, Ма́терь Бо́жію и Дѣ́ву и́стинную по рождествѣ́ воспое́мъ.
Инъ кано́нъ свята́го апо́стола Па́вла, тропари́ на 6, гла́съ 8.
Пѣ́снь 1.
Ирмо́съ: П осѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.
Я коже су́щая нарица́я не су́щая Христо́съ боже́ственнымъ ра́зумомъ, Па́вле всеблаже́нне, То́й изъ ма́терня чре́ва тя́ избра́ понести́ предъ язы́ки боже́ственное Его́ и́мя, е́же па́че вся́каго и́мене: сла́вно бо просла́вися.
Б у́дущее возвѣща́я тебѣ́ сія́ніе благоче́стія, Па́вле, и ле́сти очище́ніе, Христо́съ я́влься на горѣ́ молніезра́ченъ, о́чи у́бо помрача́етъ плотскíя, душе́вныя же вразумля́етъ Тро́ическимъ ра́зумомъ: сла́вно бо просла́вися.
О брѣ́заніе у́бо соверша́я осмодне́вное и ревни́тель оте́ческихъ, Па́вле, преда́ній, отъ сѣ́мене евре́йска, колѣ́на Веніами́нова, по зако́ну же фарисе́й я́влься, вмѣни́лъ еси́ вся́ уме́ты и Христа́ пріобрѣ́лъ еси́: сла́вно бо просла́вися.
Богоро́диченъ: Ч и́стая Ма́ти Бо́га Вседержи́теля, отъ ца́рскаго колѣ́на, Влады́чице, изра́стши и еди́на Бо́га, всѣ́ми ца́рствующаго, ро́ждшая пло́тію па́че естества́, отъ бѣ́дъ мя́ спаси́, Сы́ну Твоему́ пою́ща: сла́вно бо просла́вися.
Катава́сія: О тве́рзу уста́ моя́.
Ирмо́съ: Н е му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.
Т я́, блаже́нна, сла́дкая уста́ Христа́ Бо́га и сокро́вище тве́рдо Ца́рствія показа́ша, тѣ́мже воспѣва́емъ тя́, Пе́тре апо́столе.
Н а ка́мени твоего́ богосло́вія водрузи́ Влады́ка Іису́съ Це́рковь непрекло́нну, въ не́йже тя́, апо́столе Пе́тре, сла́вимъ.
Я ко пребо́льши а́нгелъ, Пе́тръ въ тѣлеси́: во свѣ́тломъ бо прише́ствіи сего́ Христо́съ Бо́гъ судію́ же и сосѣда́теля бы́ти рече́.
Богоро́диченъ: Н еискусобра́чная, Бо́га пло́тію ро́ждшая, страстны́ми прило́ги преклоне́нна мя́ утверди́: нѣ́сть бо, Чи́стая, ра́звѣ Тебе́, помо́щницы.
Ирмо́съ: Т ы́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.
Т ы́ ка́мень основа́нія вѣ́рнымъ душа́мъ положи́лся еси́ многоцѣ́ненъ, краеуго́ленъ Спа́са и Го́спода.
П а́вле всеблаже́нне, на основа́ніи твое́мъ, моли́ся, добродѣ́телей всехва́льныхъ назда́тися свѣ́тлости.
В сегда́ ме́ртвость Іису́сову на твое́мъ тѣ́лѣ соверше́нно, Па́вле, обнося́й, сподо́бился еси́ и́стинныя жи́зни.
Богоро́диченъ: Т я́ вси́ стяжа́хомъ прибѣ́жище и стѣ́ну на́шу, христіа́не, Тя́ славосло́вимъ немо́лчно, Безневѣ́стная.
К а́я темни́ца не имѣ́ тебе́ ю́зника? Ка́я же Це́рковь не и́мать тя́ витíю? Дама́скъ великому́дрствуетъ о тебѣ́, Па́вле, вѣ́дѣ бо тя́ запя́та свѣ́томъ; Ри́мъ, твою́ кро́вь пріе́мый, и то́й хва́лится; но и Та́рсъ мно́жае ра́дуется и лю́битъ, почита́я твои́ пелены́. Пе́тре, вѣ́ры ка́меню, Па́вле, похвало́ вселе́нныя, отъ Ри́ма соше́дшеся, утверди́те на́съ.
Ирмо́съ: С е́й Бо́гъ на́шъ, отъ Дѣ́вы вопло́щся и естество́ обожи́въ, Его́же воспѣва́юще, вопіе́мъ: сла́ва си́лѣ Твое́й, Го́споди.
Ч еловѣ́комъ ловца́ тя́, я́коже обѣща́ Христо́съ, содѣ́ла боже́ственна Своея́ Це́ркве, пе́рвому вручи́въ корми́ла.
Т обо́ю умоля́емь Жизнода́вецъ Іису́съ, вяза́ти же и рѣши́ти да́вый тебѣ́ вла́сть, Пе́тре, да бу́детъ ми́ ми́лостивъ.
Х ристо́во Ца́рствіе отве́рсти приле́жно моли́ся, Пе́тре, боже́ственную твою́ па́мять вѣ́рою несумнѣ́нною чту́щимъ.
Богоро́диченъ: Г оспоже́ Всепѣ́тая, Богороди́тельнице, моя́ помышле́нія Твои́ми моли́твами очи́стивши, покажи́ мя благопло́дна, Ма́ти всѣ́хъ Бо́га.
Ирмо́съ: В сѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.
В сѣ́де, я́коже ле́въ, ярови́дно погубля́я Христо́ву Це́рковь, Са́влъ иногда́, я́тъ же бы́въ Боже́ственнымъ гла́сомъ Агнца Бо́жія, Его́же гоня́ше, ста́до я́ко па́стырю вруча́етъ.
Х отя́й просвѣти́ти вселе́нную омрача́ется, Ана́нія же къ сему́ посла́ся, душе́вное же просвѣще́ніе дая́й и тѣле́сное отъ Боже́ственнаго явле́нія, сосу́дъ избра́нъ показа́въ того́.
П а́вломъ досто́йно Дама́скъ напоя́ется: отъ сего́ бо, я́коже отъ рая́ иногда́, во́дъ боже́ственныхъ се́й произы́де вели́кій исто́чникъ и упои́ всю́ богоразу́міемъ незави́стно зе́млю.
Богоро́диченъ: Н изложи́ си́льныя со престо́лъ Госпо́дь, Дѣ́ва и Ма́ти я́коже рече́, а́лчущія же боже́ственныхъ бла́гъ испо́лни, вѣ́рою зову́щія: сла́ва си́лѣ Твое́й, Го́споди.
Ирмо́съ: С тяжа́вый ны́, избра́нныя лю́ди, кро́вію Твое́ю, Го́споди, Тво́й ми́ръ да́ждь на́мъ, во единомы́сліи сохраня́я ста́до Твое́.
И же отъ любве́ пріи́мъ дерзнове́ніе къ Бо́гу, досто́йно чуди́мь быва́ше, лове́цъ и невѣ́жда, чудодѣ́йствуя пресла́вно благода́тію.
Н е зла́то Тебе́ ра́ди, ни сребро́, Христе́, боже́ственный Тво́й апо́столъ, но добродѣ́тель стяжа́въ, чуде́съ обогати́ся си́лою.
И справля́хуся стопы́ и гле́знѣ хромы́хъ, дѣ́йственнымъ твои́мъ глаго́ломъ: Боже́ственнымъ бо Ду́хомъ соверша́хуся пресла́вныя ве́щи.
Богоро́диченъ: В оплоти́ся Бо́гъ по ѵпоста́си, Чи́стая, изъ Тебе́ пло́тію соединя́емь, пребы́въ неизмѣ́ненъ, по Боже́ственному существу́ безпло́тенъ.
Ирмо́съ: П росвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.
Т ы́ и́стинную избра́лъ еси́, Па́вле, похвалу́, Кре́стъ Царя́ Христа́ при́сно нося́, я́коже побѣ́ду, апо́столе.
Т ебѣ́ е́же жи́ти, Христо́съ, и е́же умре́ти, пріобрѣ́теніе изря́дно: любо́вію бо сраспя́лся еси́ Распе́ншемуся на́съ ра́ди, Па́вле пресла́вне.
Р а́дуешися вои́стинну о Го́сподѣ, Па́вле честны́й, изше́дъ изъ тѣлесе́ и отше́дъ ко Христу́, Жизнода́вцу Бо́гу.
Богоро́диченъ: М оли́ при́сно Сы́на Твоего́ и Бо́га на́шего, Неискусобра́чная Марíе Чи́стая, посла́ти на́мъ, вѣ́рнымъ, ми́лость.
Ирмо́съ: В ъ ки́тѣ, Христе́, тридне́вновавъ, Іо́на прописа́ Тя, Безсме́ртнаго, я́ко ме́ртва во́лею въ се́рдцѣ земнѣ́мъ тридне́вновавша.
Я коже дре́вле, Христе́, десни́цею Твое́ю по водѣ́ пѣ́ша ходя́ща Петра́ спа́слъ еси́, и мене́, потопля́ема бу́рею лю́тыхъ напа́стей, спаси́, я́ко Милосе́рдъ.
О ста́вилъ еси́, о Пе́тре, не су́щая, и су́щая дости́глъ еси́, я́коже нѣ́кій купе́цъ, и я́вѣ улови́лъ еси́ би́серъ, Христа́, многоцѣ́нный.
И скуша́ти безу́мно покуси́вшіяся Ду́ха Пресвята́го, Пе́тре, умертви́лъ еси́: Его́же богосло́вилъ еси́ ты́ пе́рвѣе, я́вѣ исповѣ́давъ Бо́га, всеблаже́нне.
Богоро́диченъ: В ся́каго вы́шша существа́ Сло́во Бо́жіе родила́ еси́, воплоще́нно на́мъ, тѣ́мже Богоро́дицу Тя́ устна́ми же и душе́ю проповѣ́дуемъ.
Ирмо́съ: М оли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.
В ся́ пренебре́гъ кра́сная мíра, уя́звленъ Влады́чнею любо́вію и о́бщаго спасе́нія жела́ніемъ, свидѣ́тельствовати тому́ изво́ливъ, о Па́вле блаже́нне, и ны́нѣ о вселе́ннѣй моли́ся.
Я ко изря́дный Влады́цѣ подо́бникъ и въ Того́ одѣ́янъ, Па́вле, вои́стинну всѣ́мъ бы́лъ еси́ вся́къ, да вся́ пріобря́щеши и спасе́ши лю́ди, и спа́слъ еси́ я́ко вои́стинну, Христу́ улови́въ концы́.
Д осто́йно тебѣ́ дарова́ Христо́съ житіе́, апо́столе Па́вле, на небесѣ́хъ: пребыва́ющаго бо здѣ́ не возжела́лъ еси́ гра́да, блаже́нне, вѣ́ренъ служи́тель бы́въ и строи́тель та́инъ Его́.
Богоро́диченъ: П ризрѣ́ на Тя́ Госпо́дь, мое́ обновля́я существо́, я́ко Си́ленъ, вели́чія сотво́рь, Богороди́тельнице, я́коже рекла́ еси́, Всенепоро́чная, и спасе́ мя Тобо́ю изъ тли́ Бо́гъ мо́й, я́ко Милосе́рдъ.
Т ве́рдыя и боговѣща́нныя проповѣ́датели, ве́рхъ апо́столовъ Твои́хъ, Го́споди, прія́лъ еси́ въ наслажде́ніе благи́хъ Твои́хъ и поко́й: болѣ́зни бо о́нѣхъ и сме́рть прія́лъ еси́ па́че вся́каго всепло́дія, Еди́не, свѣ́дый серде́чная.
У ясни́ мо́й язы́къ, Спа́се мо́й, разшири́въ моя́ уста́ и испо́лнивъ я́, умили́ се́рдце мое́, да, я́же глаго́лю, послѣ́дую и, я́же у́бо учу́, сотворю́ пе́рвѣе: вся́къ бо творя́ и уча́, рече́, се́й вели́къ е́сть. Аще бо глаго́лю, и не творю́, я́ко мѣ́дь звеня́щая вмѣню́ся; тѣ́мже рещи́ ми подо́бная и твори́ти поле́зная да́руй, Еди́не, свѣ́дый серде́чная.
Ирмо́съ: В ъ нача́лѣ Безнача́льное Сло́во, со Отце́мъ и Ду́хомъ, Сы́нъ Единоро́дный, благослове́нъ еси́, и превозноси́мый Бо́же оте́цъ на́шихъ.
М и́лостивному, Боже́ственнымъ про́мысломъ Христо́вымъ наказу́емь, подо́битися попуще́нъ бы́лъ еси́, пре́жде стра́сти, Пе́тре, отверже́нія подпа́сти волне́нію.
Т ебѣ́ Христо́съ, первозва́нному и зѣло́ возлю́бленному, я́ко предсѣда́телю благосла́вну апо́столовъ, пе́рвому явля́ется, воскре́съ отъ гро́ба.
Т вое́ трикра́тное, е́же пре́жде стра́сти, исцѣля́я отверже́ніе, Влады́ка трикра́тнымъ боговѣща́ннымъ, Пе́тре, вопроше́ніемъ утвержда́етъ любо́вь.
Е же ко Христу́, Пе́тре, любле́нія, предлага́лъ еси́ свидѣ́теля и Всеви́дящаго я́ко Бо́га Сло́ва, тѣ́мже и люби́мое вруча́етъ тебѣ́ ста́до.
Богоро́диченъ: Я же во утро́бѣ Превѣ́чнаго, отъ Отца́ возсія́вша Бо́га Сло́ва пло́тію заче́ншую, вси́ ублажа́емъ, я́ко Ма́терь всѣ́хъ Бо́га.
Ирмо́съ: Н а по́лѣ Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́йже три́ о́троки пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.
Б ы́сть, Христе́, печа́ть и вѣне́цъ апо́столовъ Твои́хъ, и́же напослѣ́докъ зва́нный време́нъ, тща́ніемъ же всѣ́хъ превозше́дъ, съ ни́мже лю́діе церко́вніи пою́тъ Тебѣ́: оте́цъ на́шихъ Бо́же, благослове́нъ еси́.
А ще и гони́въ пе́рвѣе Це́рковь Твою́ Па́велъ у́зникъ, но премину́ дре́внюю де́рзость Твое́ю ре́вностію послѣди́. Собра́ бо, Христе́, язы́ки, зову́щія: оте́цъ на́шихъ Бо́же, благослове́нъ еси́.
Т ы́ изъ Іерусали́ма проповѣ́давъ всѣ́мъ Ева́нгеліе, объя́тъ же о́крестъ всю́ зе́млю, Па́вле, да́же до коне́цъ Иллири́ка, уча́, взыва́лъ еси́: оте́цъ на́шихъ Бо́же, благослове́нъ еси́.
В о у́жасѣ взя́тъ бы́въ, тре́тіе дости́глъ еси́ не́бо, пребога́те, и, услы́шавъ неизглаго́ланная словеса́, вопіе́ши: сла́ва превы́шнему Отцу́ и Сы́ну, сія́ніе же сопресто́льно испыта́ющаго я́вѣ Ду́ха Бо́жія глубины́.
Богоро́диченъ: Я коже на руно́ до́ждь, на Тя́ сни́де, Дѣ́во, Христо́съ Бо́гъ, и Плотоно́сецъ изъ Тебе́ про́йде, соединя́я пре́жде разстоя́щая, ми́ръ на земли́ и на небеси́ да́руя: оте́цъ на́шихъ Бо́же, благослове́нъ еси́.
Ирмо́съ: В ся́ческая нося́й непристу́пною Твое́ю си́лою, Христе́, преподо́бныя Твоя́ о́троки въ пла́мени ороси́лъ еси́, зову́щія: благослови́те, вся́ дѣла́ Госпо́дня, Го́спода.
В оздѣ́жутъ твои́ ру́цѣ и ко кресту́ тя препоя́шутъ, — Влады́ка предре́къ, Пе́тре, повелѣва́етъ послѣ́довати зову́щу: благослови́те, вся́ дѣла́ Госпо́дня, Го́спода.
Б лагода́ти сло́вомъ Ене́я, у́бо разсла́бленна лю́те, Тави́ѳу же уме́ршую, чудодѣ́йствуя, воскреси́лъ еси́, зову́щія: благослови́те, вся́ дѣла́ Госпо́дня, Го́спода.
И же Петру́ язы́ки очище́ны повѣ́давъ, Христе́, духо́вною заре́ю и мнѣ́ помышле́нія очи́сти, зову́щу: благослови́те, вся́ дѣла́ Госпо́дня, Го́спода.
Богоро́диченъ: В сесвята́я Дѣ́во, Яже Бо́га Сло́ва ро́ждшая пло́тію, души́ моея́ мра́къ Твои́ми моли́твами отгна́вши, просвѣти́, взыва́юща: благослови́те, вся́ дѣла́ Госпо́дня, Го́спода.
Ирмо́съ: Н а горѣ́ святѣ́й просла́вльшася, и въ купинѣ́ огне́мъ Приснодѣ́вы, Моисе́ови та́йну я́вльшаго, Го́спода по́йте и превозноси́те во вся́ вѣ́ки.
С раствори́ся любо́вію Твое́ю Па́велъ, до́брымъ же измѣне́ніемъ изступи́: не себѣ́ бо живя́ше сла́вный, имя́ше же, Ще́дре, живу́ща Тя́ въ себѣ́ во вся́ вѣ́ки.
Т ы́ обручи́лъ еси́, я́коже невѣ́сту, предста́вити Жениху́ Христу́ Це́рковь: невѣстово́ждь бо сея́ показа́лся еси́, Па́вле богоно́се. Тѣ́мже тя́ сла́витъ во вся́ вѣ́ки.
П одвиза́лся еси́ до́брымъ по́двигомъ и, сконча́въ тече́ніе твое́ зако́нно, сокро́вище вѣ́ры соблю́лъ еси́. Тѣ́мже вѣнце́въ, Па́вле, сподо́бился еси́ пра́вды.
Богоро́диченъ: Р а́дуйся, престо́ле огнезра́чный Госпо́день; ра́дуйся, Невѣ́сто неневѣ́стная, Дѣ́во; ра́дуйся, о́блаче, Со́лнца возсія́вшая пра́вды, Его́же превозно́симъ во вся́ вѣ́ки.
Ирмо́съ: Т я́, пресла́вную Невѣ́сту и Всесвяту́ю Богоро́дицу, Зижди́теля ро́ждшую неви́димыхъ же и всѣ́хъ ви́димыхъ, пѣ́сньми велича́емъ.
Т воя́ преизя́щная благода́ть сла́вится досто́йно, сѣ́ни бо твое́й стра́сти немощны́хъ, Пе́тре, отгоня́ющей, тѣ́мже тя́ велича́емъ.
М ечта́ньми Си́мона волхва́ богобо́рца взя́та къ возду́шнѣй высотѣ́, низложи́въ неизглаго́ланною Боже́ственною си́лою, Пе́тръ ублажа́ется.
С огрѣше́ній разрѣше́ніе моли́твами твои́ми пода́ждь, просвѣще́ніе же се́рдца и весе́ліе ду́ха пою́щимъ па́мять твою́, апо́столе.
Т воя́ вся́ испо́лнена сла́вы, освяще́нія же и чуде́съ: словеса́, мо́щи, пе́рсть и вѣ́рою, Пе́тре, покланя́емыя и любо́вію боже́ственныя вери́ги.
Богоро́диченъ: Т вое́ и́мя Пло́дъ чре́ва содѣ́я лико́вника пѣ́снь пѣ́ти Тебѣ́, Яже ра́дость ро́ждши, велегла́сно — ра́дуйся — провѣщава́юща.
Ирмо́съ: У ста́вы прешла́ еси́ естества́, Содѣ́теля заче́нши и Го́спода, и две́рь спасе́нія мíрови была́ еси́. Тѣ́мъ Тя́, Богоро́дице, непреста́нно велича́емъ.
Т вои́мъ покланя́емся вери́гамъ, я́же за Христа́, я́ко злодѣ́й, носи́лъ еси́, я́звы же, Па́вле, облобыза́емъ, я́же на сла́внѣмъ твое́мъ и побѣдоно́снѣмъ но́сиши тѣлеси́.
Н ы́нѣ разрѣши́лся еси́, апо́столе, ко Иже тобо́ю непреста́нно Жела́емому, съ Ни́мже я́ко служи́тель водворя́яся, непреста́нными мольба́ми твоя́ рабы́ къ себѣ́ привлецы́.
Н ы́нѣ ника́коже въ гада́ніихъ, ниже́ въ зерца́лѣ Христо́съ тебѣ́ зри́мь е́сть, лице́мъ же па́че зри́тся къ лицу́, соверше́ннѣ тебѣ́ ра́зумъ открыва́я Божества́.
Богоро́диченъ: Т ы́, Пресвята́я Богома́ти, похвала́ Христо́выхъ апо́столовъ была́ еси́, му́чениковъ же сла́ва и проро́ковъ основа́ніе. Тѣ́мже, вѣ́рніи, Тя́ вси́ достодо́лжно велича́емъ.
Свѣти́ленъ. Подо́бенъ: Ж ены́, услы́шите.
А по́столовъ вси́ ве́рхъ воспое́мъ, Петра́ и Па́вла боже́ственныя, вселе́нныя свѣти́льники, проповѣ́дники вѣ́ры, богосло́вныя трубы́, уче́ній сказа́тели, церко́вныя столпы́ и разори́тели ле́сти. [Два́жды.]
Сла́ва, и ны́нѣ, богоро́диченъ:
В ели́ко и пресла́вно рождества́ Твоего́ та́инство, Богора́дованная Отрокови́це и Богома́ти Дѣ́во, проро́цы проповѣ́даша, апо́столи научи́ша, му́ченицы исповѣ́даша, а́нгели же воспѣва́ютъ и человѣ́цы покланя́ются.
На хвали́техъ стихи́ры на 4, гла́съ 4. Подо́бенъ: З ва́нный свы́ше.
С ъ небесе́ благода́ть пріе́мъ, * егда́ вопроше́ніе ученико́мъ Спа́съ * дванадесяточи́сленнымъ рече́ апо́столомъ: * кого́ Мя́ глаго́лютъ человѣ́цы бы́ти? * Тогда́ у́бо лу́чшій апо́столовъ Пе́тръ, * богосло́вствуя, отвѣща́, * я́сно возопи́въ: * Ты́ еси́ Христо́съ, Жива́го Бо́га Сы́нъ. * Тѣ́мже досто́йно ублажа́ется, * я́ко свы́ше пріе́мъ открове́ніе, * вяза́ти же и рѣши́ти * пра́ведно пріе́мъ.
И же отъ Отца́ я́влься Бо́жіе Сло́во, — * кого́ Мя непщу́ете? — вопроша́ющу Христу́. — * Ты́ Жива́го Отца́ Сы́нъ, — * я́ко всѣ́мъ уста́ богогласу́я, * а́біе возопи́лъ еси́, * тѣ́мже и блаже́нъ еси́, Си́моне ва́ръ Іо́на, * возме́здіе прія́лъ еси́. * Ибо сла́витъ Бо́гъ Сего́ вѣ́рно сла́вящія, * и къ воспрія́тію бога́тно призыва́етъ, * и ка́меня тебе́ непосты́дна, * Це́ркви водруже́ніе и основа́ніе положи́.
С вы́ше зва́нъ бы́въ, * а не отъ человѣ́къ, * егда́ земна́я тма́ * помрачи́ о́чи тѣле́сныя, * нече́стія облича́я сѣ́тованіе, * тогда́ небе́сный свѣ́тъ облиста́ * мы́сленніи о́чи, * благоче́стія открыва́я красоту́. * Тѣ́мже позна́лъ еси́ изводя́щаго свѣ́тъ изъ тмы́, * Христа́ Бо́га на́шего, * Его́же моли́ * спасти́ и просвѣти́ти ду́ши на́ша.
Х ристопроповѣ́дникъ сы́й, * кре́стную похвалу́ нося́й, * ты́ многорачи́тельную Боже́ственную любо́вь, * я́ко зря́щихъ связу́ющую къ Жела́емому, * вои́стинну па́че всѣ́хъ проразсуди́лъ еси́. * Тѣ́мже и у́зникъ прозва́лся еси́ Христо́въ, * напа́стей неудо́бство, * я́ко сладча́йшее пи́щи вся́кія, изво́ливый, * и честны́я кончи́ны разрѣше́нія сподо́бился еси́, * живы́й Влады́цѣ твоему́, * Его́же моли́ * спасти́ и просвѣти́ти ду́ши на́ша.
Сла́ва, гла́съ 6. Космы́ мона́ха:
В сечестны́й апо́столовъ приспѣ́ пра́здникъ Це́ркви Христо́вѣ, хода́тайствующій спасе́ніе всѣ́мъ на́мъ. Та́йно у́бо восплеска́вше, къ си́мъ рце́мъ: ра́дуйтеся, свѣти́льницы су́щимъ во тмѣ́, мы́сленнаго Со́лнца зари́ облиста́ющіи; ра́дуйтеся, Пе́тре и Па́вле, уче́ній боже́ственныхъ основа́нія незы́блема, дру́зи Христо́вы, сосу́ди честнíи. Пріиди́те посреди́ на́съ неви́димо, сподобля́юще даро́въ невеще́ственныхъ ва́шъ пра́здникъ восхваля́ющихъ пѣ́сньми.
Б огоро́дице, ты́ еси́ Лоза́ и́стинная, [возрасти́вшая на́мъ Пло́дъ Живота́, Тебѣ́ мо́лимся, моли́ся, Влады́чице, со святы́ми апо́столы, поми́ловати ду́ши на́ша].
Славосло́віе вели́кое. [ Ектеніи́ ] и отпу́стъ.
Блаже́нна, отъ кано́на апо́стола Петра́, пѣ́снь 3-я, на 4, и Па́вла, пѣ́снь 6-я, на 4. Проки́менъ, гла́съ 8: В о всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Н ебеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Кори́нѳяномъ, зача́ло 193. Аллилу́ія, гласъ 1: И сповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Б о́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 67. Прича́стенъ: В о всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ]. Рядовы́й Апо́столъ и Ева́нгеліе вычита́емъ пре́жде.
На трапе́зѣ утѣше́ніе бра́тіи вели́кое. Аще случи́тся се́й пра́здникъ святы́хъ апо́столъ въ сре́ду или́ въ пято́къ, я́мы ры́бу и піе́мъ вино́.
Подоба́етъ вѣ́дати: Яко а́ще случи́тся пра́здникъ святы́хъ апо́столъ въ недѣ́лю, предваря́ются вся́ воскре́сная.
Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 211 – 221 об.